注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

一個人的狂歡

 
 
 

日志

 
 

又係粵語  

2010-07-09 23:44:14|  分类: 嘶啞的聲音 |  标签: |举报 |字号 订阅

  下载LOFTER 我的照片书  |

關鍵詞: 粵改普   保衛粵語

對於最近嗰個拙劣嘅"粵改普" 提案,廣州人已經給予了足夠嘅回應.我覺得當一件唔合理或者違反公義嘅事情引起足夠多嘅重視嘅時候,就唔需要過分擔心.所以我唔講乜嘢"撐廣州"嘅說話啦.

衹係,喺呢次事件中,我有幾個可能不合時宜嘅問題.

點解提案凈係針對廣州臺? 對於一個市級地方電視臺,居然咁執著咁要求佢"推普",而好似廣東臺同埋南方衛視呢種受眾更廣泛嘅電視臺,就冇收到咁嘅"厚待".我個人覺得,廣東臺某啲頻道(除咗廣東衛視係幾乎全普語播報),南方衛視同廣州臺嘅粵語播出時間真係差唔多.至起碼喺黃金時段如此.而且,作為面向全省嘅電視臺,廣東臺幾乎冇任何客家話同埋潮汕話嘅節目內容.咁,係咪有啲唔多合理? 因為廣東省嘅官方語言唔係粵語而係普通話.既然作為一個地方語言可以成為呢個省級電視臺嘅主流廣播語言,點解客家話同潮汕話得唔到同等待遇? 仲有,唔知係咪我錯過咗定點,我貌似冇喺廣東臺同南方衛視睇到關於廣州臺"推普"爭議嘅比較詳盡系統嘅報導(我亦冇留意到<今日最新聞>嘅今日最爭議有呢個咁爭議嘅話題).或者係我小人之心,我覺得呢個提案本身隱隱有啲陰謀味道,唔知係咪一種打擊競爭對手嘅手段.
有冇人可以同我解釋下,大家一直覺得打壓粵語唔合理,咁我以上講到嘅,係咪另一種被大多數人忽略或者選擇性忽略嘅唔合理?
PS.我睇廣東臺同南方衛視絕對多過廣州臺.因為我覺得佢哋某程度上更加"廣州".

如果廣州臺真係"被推普",我本人非常擔心...唔係擔心粵語會一夜之間魂飛魄散,而係為廣州臺嗰班主播們嘅飯碗擔心.我睇廣州臺新聞時間唔算長,大概就五六年.不過嗰幾位主播嘅粵語水平一啲都冇提高到."港州"...咩林剛小莉全部都係咁.在外採訪手忙腳亂嘅記者就更加係懶音錯音多多啦.身為粵語媒體工作者,居然咁樣嘅粵語水平.如果廣州臺粵改普,呢班人唔知邊個肯要.或者佢哋嘅普通話會好標準?去央視好冇?哼哼. 要知道,入電臺做嘅人係要經過嚴格嘅語言測試篩選,確保係冇發音毛病先合格可以出街.我唔係話要苛求每隻字都發音標準字正腔圓,但起碼要有"有錯必改"嘅原則喺度吧.廣州臺嘅幾個主播,做咗咁多年,完全冇改善,明顯睇出根本冇人去糾正佢哋,亦唔知道佢哋係出於水平問題定真係傻更更唔察覺,居然一直都冇自我改善.除咗講失望同遺憾,唔知可以點評論.佢哋舊年提出一個口號話咩"更廣州,更好睇".冷笑...如果真係粵改普,我稍稍覺得係唔抵可憐.

或者,每位主播背後,都有千千萬萬個群眾撐住...我對身邊嘅人唔會苛刻要求,因為我覺得自己係五十步笑百步,除咗對細孥.我會盡力,盡我所知糾正我表妹嘅懶音.我希望佢比我有出息得多,講說話寫字正規標準得多.當我一次次聽到人哋講"撐'港'州",一次次喺網上見到人哋講"我喺廣州人"...我心入面有些許覺得苦.我真係知道自己係五十步笑百步,呢啲毛病我曾幾何時都犯過.所以我唔係鄙視呢啲人,唔係覺得自己覺悟高人一等之類,絕對唔係.而係我好遺憾咁見到現時粵語嘅生存狀態,係有病噶...我似乎可以理解到,嗰啲苦口婆心勸導大家"廣州人講廣州話" 嘅前輩們係何等嘅鬱悶同苦澀.依家唔係話要求大家都要走去做粵語專家研究粵語,衹係想大家喺有機會改正嘅時候,都能夠主動咁去自我糾正.但大家係咪真係做得到,做得徹底?當一個人病咗,俾人輕輕一推就會跌倒.冇錯,推我哋嘅人當然係有錯.我哋亦肯定會抵抗,咁就好似今晚睇電視見到嗰個廣州最後生嘅講古佬講嘅咁,"你俾人強姦肯定會反抗啦",呢種應激,正常人都會有.但我哋如果有一日真係跌倒,究竟邊個先係罪魁禍首? 係諱疾忌醫嘅我哋,定係輕輕推我哋嘅人?
冇錯,政府正在行動,但佢哋唔會下令禁止粵語,如果咁樣就想喺廣東推普太傻太天真.佢哋要做嘅係配合我哋自己本身嘅問題,潛移默化,輕輕咁推.我唔係要灌輸"政府要消滅粵語" 嘅思想(至於有冇乜機密文件係指示要咁做我不得而知),而係,呢種推普,實質上喺我哋廣東起到一種"毀滅" 嘅效果.原因何在? 我覺得就係因為我哋自己本身就不斷咁喺度丟失緊自己嘅調,自己嘅韻.咁樣,兇手究竟係邊個?

我唔係要打壓大家反抗嘅聲音,正如被強姦一定要叫救命咁,一定要發出我哋自己嘅聲音.但係,呢種聲音除咗大聲之外,係咪應該保留有一絲理性同反思? 我哋喺保衛粵語嘅時候究竟要抱一種點樣嘅態度? 我哋要點樣行動? 係咪謾駡可以解決問題? 係咪好似豆瓣某啲"有素質嘅廣州人"提議嘅咁走到地鐵入面去塗鴉,同推普標語作對? 之前睇G4訪問過一位編修廣州音字典嘅老前輩老教授.佢話支持推普,但唔應該以犧牲粵語為代價.或者我哋可以以呢位老人家嘅態度為標杆,正確對待我哋嘅語言,理性發出自己嘅聲音.講好用好自己嘅語言,可能就係最有力嘅保衛,最有力嘅反擊.

廣東人,雖然我哋已經包容咗好多嘢,但唔代表我哋依家就好包容.事實上我覺得我哋嘅包容性已經越來越淡,越來越淺薄.我話"廣州人好包容" 嘅時候都會口震震.創新,開放,務實,包容,經常係貼喺近現代廣東人身上嘅標籤.我哋應該如何把握? 我哋究竟係要做"頑固" 嘅廣東人,定係要做"值得尊重" 嘅廣東人?

  评论这张
 
阅读(16)| 评论(2)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017